Tuesday, June 07, 2011

حملة البحث عن رجالة




لو سألت أي بنت ايه مواصفات فارس احلامها , هترد بمنتهي التلقائية وتقولك (لازم يكون راجل) !! وتسكت
المسأله ديه كانت دايما محيراني ,, ليه كل البنات مفتقده عنصر الرجوله فى حياتها أو علي الأقل متخيله انها مفتقداه



يعني ايه راجل أصلا ؟؟ وهل كل الرجاله فى البلد يحملون بطاقات شخصية تصفهم بالذكورة وهما لا مؤاخذه ؟؟

أمال كمية الخلفه المهوله اللي عاوزين يحددوها ديه جت منين ؟

هل الرجاله فعلا خلصوا فى حرب أكتوبر ؟؟ أمال مين قام بالثوره ؟؟؟

وطبعا فى حد رخم انا عارفاه وهو عارفني من زمان بيطلع فى كل موضوعاتي هيرد عليا ويقولي :الرجوله يا مريم متعرفيش يعني ايه ؟؟



الرجوله يعني راجل ياخد باله منك ويحميكي ويقولك أه اعملي كذا او لا متعمليش كذا ويشوف لبسك وانتي نازله ويبص علي تليفونك ويغير ويقولك مين فلان ومين علان ,, ويدخل على الفيس بوك ويقوم خناقه كبييييييييييييره لما بيبو ابن خالتي يعملي كومنت

ولما اكون هخرج مع صحباتي كل دقيقه يتصل ,, ولما اكون بايته عند عمتي اكون متخانقه معاه علشان يوافق اصلا ولو قلتله انا عاوزه ادخل سينما مع صاحبتي يهزأني ويقولي ازاي يخطر فى بالك اصلا تسألي السؤال ده

ولما يكون زعلان ميردش علي تليفوناتي ويحسسني بغلطتي ويمنعني من الخروج


و


و

و



و



طيب ما تختصري وتقولي انك عاوزه سجان ,, أو عاوزه حد يخنق عليكي ويقرفك , وبعدين أ ب جواز انه ياخد بالة منك اصلا ديه مش رجولة ده غصب عنه يعني مش حاجه زيادة

وبعدين ما انتي عندك باباكي مثلا يمعنك ويحبسك ويمد ايده عليكي ان لزم الأمر لو هيا هرموناتك طالبه نكد وقرف ولا لو عندك اخ كمان هيبقي عز الطلب وهتاخدي اعلي جينات رجولة ممكن تشوفيها فى حياتك من تسلط وفرض رأي وأوامر عمال علي بطال

ليه دايما لازقين الصفات المهببه ديه للرجوله ؟؟؟؟؟؟؟؟؟ انا مش فاهمه بجد



الأخت اللى تفضلت بشرح الرجولة السابق ديه احب ابشرها كلها كام شهر جواز وهتقرفي وهتزهقي وهتقولي فيييييين ايام الحرية



واحب اقولك مفهوم الرجوله فى نظري

ومش هقولك الراجل مش بس بكلمته زي الفنان احمد ماهر ولا هقولك شعارات

بس هقول ان الرجوله تتمثل فى شخص يعلم تمام العلم كيف يتعامل مع أنثي

يجيد تهدأتها حال الغضب

يجيد الحنو والعطف عليها ساعة المرض

يجيد تدليلها ساعة الحب

يجيد اجبارها على تنفيذ كافة رغباته برضاها وهي تشعر انها هي من اختار وقرر

يتفنن فى اطراءها ويجيد السماع الي مشاكلها

يشاركها اهتماماتها دون ان يبدي انه مضطر لفعل ذلك

يدفعها للأمام مؤمناً بها



ببساطة كده,, الراجل فى نظري ميبقاش راجل بالشخط والنطر والصوت العالي والبلطجة وفرض الرأي

الراجل فى نظري هو الراجل الجنتل ,, الذي يجيد التعامل مع المرأه فى شتي المجالات

واعترف ان طول عمري الرجل الجنتل هو الأكثر جاذبية بالنسبه لي

أكثر من الوسيم والجميل والغني ومفتول العضلات والمنحنح اللي شبه مهند جوز اختنا نور

وعلي ذكر مهند جوز اختنا نور,, أو أختنا التانيه مهند

سؤال بيطرح وبيجمع وبيضرب نفسه بالجزمه لان ملوش اجابه ,, ألا وهو :

ليه أخواتنا الفضليات صاحبات مبدأ



الراجل هو اللي يزعقلي ويفرض رأيه عليا ,, مش اللي يدلعني ويعاملني بحنية


ليه اخواتنا دول بقه بيحبو مهند جدااااااااااااااااااا وبيتمنو أزواجهم أو خطابهم يتفرجو علي لو حلقة علشان يتعلمو من النحنحة والسهوكة بتاعة مهند ؟؟؟ مش بردو مهند علي حسب نظريتكم مش راجل ؟؟

اسفه ياسي مهند انا بس بشرح وجهه نظري ووجهة النظر الأخري


وبالمناسبه ديه احب اعترف ان مهند بردو راجل ذكي ,, أي نعم هو ليس نوعي المفضل من الرجال لاني بحب الوسطية ,, بس علي الأقل قدر يكسب تعاطف وحب وتقدير بنات الشعب المصري كافة الا من رحم ربي ,, وقدر وبمنتهي البساطة يخلي كل البنات ينقلبوا علي بنات جيلهم ويشتمو نور وينعتوها باصعب الصفات علشان هيا جبله ومش بتحب مهند رغم اللي كان بيعمله معاها



وطبعا هنا وصلت لمرحله سؤال صعب بردو مش لاقياله اجابه

هل يا تري المرأه هي التي تبحث عن الكمال فى العلاقه بحيث تريد دلع ورقة اختنا مهند مع حمشنة رشدي أباظة لما لاش شادية بالقلم,, مع خفة ظل أحمد حلمي مع وسامة أحمد عز مع شوية الشعر اللي فى صدر تامر حسني ؟؟؟؟؟؟؟؟؟



أم أن الرجل فشل فشلاً ذريعا فى الوصول الي مفاتيح المرأه , وأنه بتقصيرة واهمالة لمشاعرها اصبحت لا تعرف ماذا تريد فاصبحت أسيره للمسلسلات والشخصيات التي تشبع رغبتها فى التعامل مع الرجل الذي يدور فى خيالها ومع الأحلام الوردية التي تداعب مخيلتها


لقد عجزت فى الحقيقة عن تفسير معني كلمه


"عاوزه اللي اتجوزه يكون راجل"

لأني لقيت الجنس التالت فى مصر مش منتشر أووي يعني

وعجزت أيضاً عن تفسير كينونة كلمة رجل

وعجزت عن فهم كثير من الفتيات

وعجزت عن فهم الأكثر من الرجال

ولكن توصلت لحقيقه واحده وهي





أن الحيرة وعدم الاستقرار وعدم النضوج الكافي وعدم تحديد ما يريده اي من الاطراف من الطرف الأخر والأنانية فى المشاعر والمطالب وعدم التفاهم وعدم تحمل المسئولية ,, وراء تطور كلمة
عاوزه اتجوز راجل
ووراء كلمة شهيرة للرجال سنتناولها فى موضوع منفصل وهي
نفسي اتجوز واحده متنكدش عليا

خلفيات اجتماعيه وثقافيه جعلت من النساء شخصيات لا تثق بأي مخلوق الا اذا كان رجل ,, وهذا أصبح حلم

أن تجد الرجل


ربنا معاكم يا بنات فى حملة البحث عن رجالة



بتمنالكم كل الخير والله

7 comments:

Maha said...

7elwa 2wyyyyy,damaha 5afeef w mshaweka t5aleky tkamleha l3'ayet 2l 25er

crazyrama said...

شكرا يا حبيبتي ربنا يخليكي .. منوراني

banyadmaia said...

بس ليه متحاملة على البنات كده يا مريم .. البنات دول غلابة والله :)

crazyrama said...

لا يا سمسم والله مش متحامله ولا حاجه بس فى بنات فعلا دماغهم اقل من انها كمان تكون فاضيه .. هايفين هيافه تستفز .. أكيد كمان فى رجالة مستفزه بس انا بتكلم عن رأي معين لفئة معينه من البنات لا تمثل كافه البنات

Anonymous said...

lol el ba7th 3n regala lol we 100 lol kman mashy ya bnt galal
bs meen ele bt2ole eno mat men as7abek dh

abdallah barakat said...

بسم اللله ماشاء الله
كتاباتك غاية في الروعة

شركة المثالية للتنظيف said...



شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر